Nga Shpresa Dine
Ngjarja e sotme në Fier shpreh edhe njëherë nevojën ulëritëse për evidentimin dhe publikimin e të gjithë shtetasve që kanë tendenca të dhunës apo ngacmimit seksual ndaj fëmijëve me qëllim parandalimin e ngjarjeve edhe më të rënda në të ardhmen.
Ngjarja e sotme më risjell në kujtesë Serial Killerin e fshatit Çukë të Sarandës, Klodian Saliaj. Në vitin 2005 ai ishte 22-vjeç. Përdhunoi dhe më pas vrau 6-vjeçarin rom Besnik Shaqiri. Më pas vrau edhe 65-vjeçarin rom Petrit Barjami. Dyshohej edhe për ngjarje të tjera të padokumentuara. U dënua nga Gjykata e Sarandës me burgim të përjetshëm.
Nëse në atë kohë shteti do të kishte hetuar me përparësi ngjarjet por edhe profilin e këtij personi, ndoshta mund të parandalohej vrasja e dytë, pse jo edhe të dyja bashkë.
Sot pas 16 vitesh, një detaj të papublikuar më parë e ndaj me ju. Në vendin ku u gjet trupi i Besnikut, policia sekuestroi një bisht cigareje “Karelia”. Pas vrasjes së Petritit, Klodiani u shoqërua pasi ishte parë në fshat në biçikletën e të ndjerit. Gjatë marrjes në pyetje, veç të tjerave kërkoi edhe cigare. Refuzoi “Marlboro” të oficerit, duke kërkuar “Karelia”. Pikërisht në këtë moment hetuesit u bindën se kishin para jo vetëm të dyshuarin e vrasjes së Petrit Barjamit, por edhe përdhunuesin e vrasësin e Besnikut. Përpara kishin një Serial Killer maniak, i pari dhe i vetmi deri më sot në Sarandë.