Nën drejtimin e Kryebashkiakut Adrian Gurma, njëherësh edhe Kryetar i Komitetit Drejtues të Mekanizmit Kundër Dhunës, është mbajtur mbledhja e dytë e kësaj strukture. Ishte një tryezë me prani të mjaft aktorëve të këtij mekanizmi, duke nisur nga institucioni i qeverisjes vendore, nga organi i Prokurorisë, Gjykatës, Përmbarimit e Komisariatit të Policisë, nga Zyra e Arsimit, Zyra Vendore e Punësimit dhe shoqata që operojnë në fushën sociale. Takimi ishte reflektim real ndaj rasteve të shtuara të dhunës në familje, që për këtë vit kanë arritur në 50 në rajonin e Sarandës.
“Në takimin e radhës së Komitetit Drejtues për Mekanizmin e Kordinuar, për rastet e dhunës në familje, diskutuam mbi trajtimin për rastet që kërkojnë mbrojtje, si dhe kordinimin dhe angazhimin më të mirë të të gjithë anëtarëve, duke u fokusuar në 3 shtylla kryesore të punës sonë: parandalim, mbrojtje, referim, për zgjidhje të duhur dhe të shpejtë në çdo rast.”, u shpreh kryebashkiaku Adrian Gurma pas këtij takimi.
/sarandalife.al/
