Më në fund për gropat e frikshme në fushën e Krongjit, bashkia Finiq, të shfaqura në fillim të këtij viti, u gjet një zgjidhje, me qëllim shmangien e këtyre gropave nëse mund të shfaqen edhe në rrugën në afërsi të tyre. E nëse do të ndodhte një dicka e tillë edhe në rrugë do të krijonte problem në aksin rrugor Minierë- Muzinë.
Këtë e raporton Autoriteti Rrugor Shqiptar në faqen e tij.
“Në segmentin rrugor Jergucat-Sarandë, pranë ish-Minierës së Kripës së Gurit, Dhrovjan, kanë filluar punimet për krijimin e një bypass-i si pasojë e fenomenit postminerar të cedimit të sipërfaqes, ku janë shfaqur hinkat në livadhin buzë përroit të Vrisit rreth 15-20 m larg nga përroi. Devijimi i këtij segmenti, me qëllim shmangien e galerive nëntokësore të ish-Minierës së Kripës, ka një gjatësi rreth 400 m dhe do të bëjë të mundur funksionimin normal dhe të sigurt të segmentit rrugor Jergucat-Sarandë.
Punimet kanë ecur me ritme të mira ku aktualisht po bëhet asfaltimi”,konfirmon në faqen e vet Autoriteti Rrugor Shqiptar.