Saranda është bërë vendi pritës i eventit më të madh të shahut në keto 30 vitet e fundit.
Ky Festival organizohet nga Federata Kombëtare e Shahut dhe ka mbështetjen e Bashkisë së Sarandës e të Kryetarit të saj, Adrian Gurma.
Festivali i Shahut ka startuar pasditen e 2 tetorit 2021, në mjediset e Hotel “Mediterrane”. Pjesëmarrës në të janë 14 ekipe: 9 ekipe nga Shqipëria, ndër të cilët 2 nga Saranda, 3 ekipe nga Kosova, si dhe 2 ekipe nga Maqedonia e Veriut.
Çelja e eventit u përshëndet nga Manjola Pilinci, sekretare e Federatës kombëtare të Shahut. Në emër të Kryebashkiaku Adrian Gurma, pjesëmarrësit i përshëndeti përgjegjësi i Klubit Shumësportësh “Butrinti”, Fuat Karalliu.
Festivali Mbarëkombëtar i Shahut do të zhvillohet nga 2-10 tetor në Sarandë dhe do të dëshmojë për nivelet ku ka arritur ky sport në hapësirën shqiptare, si dhe për të ardhmen e tij.
Ai shoqërohet nga interesimi i posaçëm i mediave të specializuara dhe nga mediat vendore.
