Në orët e vona të së hënës, pushoi së rahuri në moshën 85 vjeçare zemra e Dilaver Latos(Bajo). Ai lindi në vitin 1935 në qytetin e Delvinës. Dilua, kështu i flisnin delvinjotët në rininë e tij, është aktivizuar në veprimtaritë kulturore artistike të qytetit, si në komplekse, kore artistike apo në estrada të shumta, që bëheshin atëherë duke debutuar si një aktor shumë i mirë.
Buzëqeshja, ëmbëlsia, paraqitja, interpretimi i tij tërhiqnin vëmëndjen e artdashësve delvinjotë. Por jo vetëm kaq Dilua ka qenë i aktivizuar edhe me skuadrën e futbollit te Hidrocentralit të Bistricës dhe më pas me skuadrën e qytetit përkrah futbollistëve të tjerë si, Kristaq Mara, Turabi Bajo, Spiri Dino, Spiro Xhimo. etj.
Por ajo që ka mbetur në kujtesën e delvinjotëve është puna e tij si operator kinemaje, ku shfaqte filmat në kinoteatrin e ri të Delvinës. Ai ishte i vetmi argëtim vizual në celuloid për delvinjotët dhe Dilua e ka kryer më së miri këtë detyrë. Ishte interesimi i tij që delvinjotët ndiqnin në ekranin gjigand të kinemasë, filmat e fundit që dilnin, të cilat ai i siguronte me dëshirën dhe përpjekjet e tij. Kinemaja e dytë që shfaqte filmat pas Tiranës, ishte ajo e Delvinës, meritë e kinooperatorit të famshëm delvinjot Dilaver Lato(Bajo). Ishte po merita e tij në freskimin e aparaturave sa më moderne të transmentimit të filmave. sarandalife.al i shpreh ngushëllimet më të sinqerta familjes dhe të afërmve të tij.