Lamtumirë “Aktori i madh i roleve të vogla”, Lek Mosi (Video)

Nëse ka qenë dikur një aktor në trupën e Estradës profesioniste të Sarandës i cili ka
spikatur me role të vogla, karaktere dhe që mund të identifikohet më së miri
me shprehjen ”aktori i madh i roleve të vogla”, ky ka qenë aktori Lek Mosi i cili është ndarë sot nga jetanë moshën 97 vjeçare në qytetin e Shkodrës.

Leka ka lindur në qytetin e Shkodrës. Ai rrjedh nga një familje patriote shkodrane.
I jati i tij, një intelektual i kohës, në vitet 20, është shpërngulur në qytetin e Sarandës
ku kaloi dhe pjesën më të madhe të jetës në këtë qytet. 

Leka në moshën e tij të re ka punuar si infermier në Spitalin e Sarandës. Pjesëmarrja në lëvizjen amatore teatrale të qytetit e evidentoi atë si një talent me aftësi të rralla aktoriale, sidomos në role karakteresh.Kjo dhunti i mundësoi atij aktivizimin fillimisht si amator dhe më pas si aktor
profesionist në Estradën e Sarandës.

Mund të them me bindjen e plotë se ishte aktori më interesant dhe më
i talentuar i trupës së Estradës së Sarandës, që do ta kishin zili edhe trupat e tjera të estradave të vendit.

Tipik dhe i prerë për karaktere “meskinësh”, “indiferentësh” dhe personazhesh të “mbyllur në vetvete”, që shikonin vetëm “interesin e tyre”. Tepër i natyrshëm në interpretim dhe shumë i dashur për spektatorin.
Me një zë karakteristik, interesant, të një njeriu që duket sikur “flet me veten”.

Janë të shumta karakteret e interpretuara prej tij, të cilat kanë përcjellë humor, gaz dhe harenë shfaqjet e ndryshme të estradës sonë. Ai krahas punës si aktor ka punuar edhe
si magazinier në trupën e Estradës deri në daljen e tij në pension.

Mbas daljes në pension familja e tij u rikthye në qytetin e Shkodrës ku kaloi dhe pjesën tjetër të jetës.Gjatë gjithë jetës dhe punës së tij është karakterizuar nga një korrektësi, disiplinë e rregull të veçantë,duke qenë shembull për të gjithë artistët e estradës.

I kudo ndodhur dhe i pa përtuar për të ndihmuar kolegët e tij. Ndarja nga jeta është një humbje për komunitetin e artistëve të qytetit, të cilët me këtë rast, shprehin ngushëllimet tyre familjes Mosi. Në prill të vitit 2012 me rastin e 50-vjetorit të krijimit të Estradës profesioniste të Sarandës, Lek Mosi nuk mundi të vinte dotë dhe dërgoi këtë mesazh përshëdetës me video.

sarandalife.al i shpreh familjes së tij ngushëllimet më të sinqerta.