Në Shqipëri prej disa ditësh është konfirmuar se ka mbërritur gripi i shpendëve dhe mijëra pula kanë ngordhur, ndërsa sot nisi edhe asgjësimi i tyre. Autoriteti Kombëtar i Veterinarisë dhe Mbrojtjes së Bimëve ka dhënë disa informacione dhe këshilla për konsumatorët në lidhje me transmetueshmërinë.
Influenca aviare ose gripi i shpendëve mund të transmetohet nëpërmjet ushqimit, ujit, pajisjeve, veshjeve të kontaminuara të njerëzve që kanë patur kontakte me shpendë të infektuara dhe kafazeve të kontaminuara.
Influenca aviare nuk përhapet nëpërmjet ajrit, por vetëm me kontaktin e drejtpërdrejtë me zogjtë e prekur, ose materialet e kontaminuara.
Mundësia e transmetimit të Influenca aviare në njerëz është e rrallë. Zakonisht, nevojitet kontakt shumë i ngushtë ndërmjet personit dhe zogjve të infektuar.
Agjencia Kombëtare e Veterinarisë këshillon të gjithë qytetarët që nëse shikojnë shpend të ngordhur, të njoftojnë menjëherë shërbimin veterinar.
