Në një status në Fb, studiuesi Josif Papagjoni bën publike se kritiku i artit, shkrimtari dhe publicisti Miho Gjini ndodhet me probleme shëndetësore në një spital në Athinë.
“Mora vesh se Miho Gjini ka pësuar hemoragji cerebrale dhe është i shtruar në spital në Athinë. Ky mik i shtrenjtë i jetës sime, i thjeshtë, optimist sa s’ka më, një hedonist i rrallë dhe aventurier i së bukurës dhe shoqërisë, ky i palodhur për të blatuar mijëra shkrime kritike për teatrin dhe letërsinë me 33 libra të botuar; ky mik i artistëve shqiptarë në gjithë hapësirën tonë kombëtare, Shqipëri, Kosovë, Maqedoni, por edhe i artistëve të diasporës në Greqi, Itali dhe Amerikë, ky njeri që ka vetëm mirësi në shpirt – është në luftë me jetën. Por unë e di se ai është i fortë, optimist si rrallë kush dhe Zotin e ka me vete. Ne do shkonim sërish bashkë në festivalin teatror të Prishtinës. Shërohu sa më shpejt Miho se shfaqje e libra pa fund na presin, dhe ato duan penën tënde të bukur e plot emocion…”, shprehet studiuesi Papagjoni.
Edhe stafi i “Sarandalife” uron shërim të shpejtë Miho Gjinit, këtij mjeshtri krijues të artit dhe letërsisë.
/sarandalife.al/