Mes e lotëve e dhimbjes u përcoll mesditën e sotme për në banesën e fundit mësuesja e disa brezave, nëna e dy fëmijëve, bashkëshortja e qytetarit të Sarandës, Dik Veliu. Mes familjarëve, në këtë ditë të dhimbshme, merrnin pjesë miq e të afërm, kolegë e shoqe të Tatjanës. Tatjana Veliu, e cila prej kohësh vuante nga një sëmundje e rëndë, humbi jetën në moshën 48 – vjeçare, një ditë më parë në shtëpinë e saj këtu në Sarandë. Pak ditë më parë ajo ishte kthyer nga Greqia, ku ishte për terapi të specializuar në një nga spitalet e Athinës. Por, edhe pse trajtimet mjekësore tek Tatjana u kryen me rigorozitet, përsëri vdekja e pamëshirshme nuk e kurseu. E mori në gjirin e vet Tatjanën e qeshur, vitale, e tërë talent si mësuese, duke mbetur kështu për t’u kujtuar në jetë të jetëve si Tatjana e dashur dhe e mirë për sarandiotët, e në veçanti për nxënësit e kolegët me të cilët ajo i pati në jetë. Lamtumirë, Tatjana, o ëngjëlli mbrojtës i familjes tënde!
