Një gërshërë në dorë, pranverë dhe disa lule, që kërkojnë jetë, dhurojani Xhemilit dhe i keni falur parajsën mbi tokë.
Sot e gjetëm duke “i dhënë” jetë luleve në një lokal buzë shëtitores: “Gojë nuk kanë të flasin, por unë e di mirë ku t’i ngacmoj e ato fillojnë e më tregojnë se ku e kanë problemin”, u shpreh Xhemili.
Lulishtari Xhemil Kalo, banor i Delvinës ashtu me atë qetësinë e tij që natyrisht e ka të kultivuar nga lulet erëmira, nisi të tregojë: Prej vitit 1980 e deri më sot ai përkujdeset për lulet e qytetit.
Eshtë i pari në Sarandë, që u mor me shtimin e pemës së piperit. Çuditërisht sekretin nuk e ndan me askënd, por sfidon këdo në qytet që ta rritë atë bimë e të kujdeset për të.
Për 17 vite rresht, ai nuk u ndal duke u kujdesur për gjelbërimin e “Hotel Butrintit”, duke e parë jo si profesion, por pasion.
Madje ai shton dhe këndvështrimin e tij se si ballkonet e qytetit do të kishin më shumë hijeshi, bukonvilet janë çelësi i bukurisë, sipas tij.
/sarandalife.al/
