Të jesh bashkëqyetar me doktor Vasil Llajo, është krenari pasi ai për shumë vite në profesionin e mjekut ka bërë emër dhe ka gdhendur personalitetin e vet, jo vetëm si mjek i aftë, po edhe si njeri human, që për çdo rast është në shërbim të qytetarëve në nevojë.
Vasil Llajo, u lind në qytetin e Sarandës në një familje punëtorësh, ku i ati ishte ai marangozi duarartë dhe e tërë familje e tij rrezatonte mirësi dhe dinjitet përmes përkushtimit dhe punës së ndershme.
U rrit në mjedisin e këtij qyteti dhe u mbrujt me dashurinë për njerëzit. I deshi dhe e deshën pasi Vasili iu përkushtua një jetë qytetarëve, familjes dhe shoqërisë.
E nisi profesionin e mjekut në zonat e largëta të Sarandës, në Markat e Janjar, ku shtegëtoi në tërë atë zonë të thellë, pa përtuar, ditën e natën në roje të shëndetit të njerëzve. Po Vasili nuk mbeti një mjek i zakonshëm fshati.
Ai kishte synime të mëdha, që i bëri realitet me vullnet pa u tërhequr edhe përballë vështirësive monetare pas viteve ‘90.
Në një intervistë realizuar nga gazetarja Shpresa Dine doktori Vasil Llajo na flet për jetën e tij si mjek, kryesisht për synimet e tij, tashmë realitet, “INTERMEDICA” laboratorët të shpërndara në Shqipëri dhe Kosovë.