Problemet tek ura e Vanës, ura që lidh fshatin Vanë por edhe fshatrat e tjerë me rrugën nacionale për në Delvinë dhe Sarandë, është rrëzuar për të disatën herë.
Banorët shprehen se e kanë shumë të vështirë të kalojnë lumin me këmbë apo me mjete të tjera, veçanërisht në kohën me shi kur lumi është i rrembyer.
Janë të detyruar ta kalojnë çdo ditë lumin për punët e tyre të përditshme, por edhe për të çuar fëmijët në shkollë. Në këtë periudhë lumi nuk ka ujë dhe banorët nga njeri breg në tjetrin e kalojnë atë me këmbë, ndërkohë që ata persona që kanë mallra dhe ngarkesa për të transportuar i kalojnë ato me traktorë pasi ura është totalisht e dëmtuar dhe e pakalueshme.
Banorët bëjnë apel për ta rregulluar këtë urë që lidh zonën me rrugët nacionale. Të vihet dorë sot, shprehen ata, sa ende nuk kanë nisur shirat e lumi i Kalasës të bëhet i tërbuar e nuk do të ketë më mundësi të rregullimit të saj.
